Құрметті шахмат ойынының жанкүйерлері!

Қай шахмат мектебіне барсаңыз да кәсіби бапкерді іздегеніңіз жөн, бұл өте өзекті мәселе. Ұстазбен сөйлесіп, өмірлік ұстанымдарын байқап көруге тырысыңыз, балаңыздың осындай адамға ұқсағанын қалар едіңіз бе деген сұрақты өзіңізге қойып көріңіз. Себебі сынықтан өзгенің бәрі жұғады. Барлық мәселені о бастан айқындап алған абзал: шәкірттің жетістікке жетуі маңызды немесе жай үйренгені қажет. Жақсы тәлімгерді тапқан соң, оның жұмысына сенім білдіру керек. Баланың алдында бапкердің абыройын төмендетудің, істеп жатқан іс – әрекетіне күмәнмен қараудың қажеті жоқ. Өкінішке орай, кейбір ата – аналар жаттығу процесіне бас сұғып, ұстаздың жұмысына қатысты мәселелерге араласа бастайды. Олардың пайымдауынша балаға қысым көрсетіліп, тым жоғары талап қойылады. Бұл ыңғайсыз жағдай, себебі көбінесе педагогикалық білімі жоқ, бұл саланы мүлдем білмейтін адамдардың ақыл үйретуі біздің қауымды қынжылтады. Шығармашылық адам болған соң, бұндай жағдайлар көңілге келеді. Табысты тәлімгерлердің2 басым бөлігі тәжірибелі, өз ісінің маманы және азды – көпті жетістікке жеткен тұлғалар, осыны ұмытпаңыздар.

Олжас Меңғали

Қайырлы күн құрметті оқырмандар!

Алматы қаласының шахмат мектептерінде, оқушылардың көшіп жүруі қалыпты жағдай. Бірақ бапкерлердің бір бөлігі бұл үрдіске ерекше қызғанышпен қарап, балаға, ата – анасына кәдімгідей ренжіп, өкпе назын айтып жатады. Сондықтан кейбір ұстаздың шәкіртті өзінің меншігі ретінде санауы үлкен әбестік. Осындай жағдайларды түсінбеймін, негізгі бағыт-бағдар ол шәкіртіңнің табысты болашағы. Бұл жағдайда бапкердің ең басты міндеті – мүмкіндігінше білімімен, тәжірибесімен бөлісу, шәкірттің ынтасын бағыттау, қабілетін жетілдіріп жетістіктерге жетелеу. Тәлімгердің жеке басының қаржылай шығыны, амбициялары бұл жерде маңызды емес. Ұстаз өзінің келешектегі беделін ойлау керек, егер шәкіртің немесе оның ата-анасы сен туралы көпшілік алдында жақсы пікір білдіріп жатса, мәртебең жоғары болатынын ұмытпаған жөн.

Олжас Меңғали

КӘСІБИ БАПКЕР. Олжас Меңғали

Қайырлы күн құрметті оқырмандар!

Сіздермен бапкерлік өмірде жиі кездесетін жағдаймен бөліскім келіп тұр. Қай салаға барсаңыз да кәсіби маманды іздегеніңіз жөн, себебі шала сауатты адамнан жақсы нәтиже күтпеңіз, болашақта зардап шегуіңіз мүмкін. Қаншама бала осындай ұстаздардың қолына түсіп, тиісті деңгейіне көтеріле алмай, өз уақыттарын жоғалтты. Егер де, үйдің іргетасын дұрыстап қаласаңыз, онда тұрғызылған ғимарат сапалы, ал жақсы бапкердің қолына түссеңіз, келешекте үлкен биіктерден көрінуге мүмкіндік көп болады.
Атақты Брюс Лидің бапкері Ип Ман айтқандай: «Оқушы үшін кәсіби мұғалімді табудың қиын екені рас, алайда жаттықтырушыға жақсы шәкіртті тауып алу одан да ауыр».
Сіздердің өмірлік жолдарыңызда сауатты мамандар көп болсын!

Олжас Меңғали

https://www.youtube.com/watch?v=c4s5R7sZ0h0